تجربة عمري

تجربة عمري

العمر وقفات والدنيا دروس وعبر
والعاقل الي عرف الايام وحمولها
.
ردات الافعال للفاطن ترد الخبر
شف تجربه عمري فادتني وبفصولها
.
ان زل غالي ف للغالي مكان وقدر
وان غاب صاحب فله عذرين ويقولها
.
والثالثه ثابته ما عاد فيها عذر
سلم على الي قال الحاجه يطولها
.
ان جاملوك الاقراب فخلهم واعتبر
وان اكرموك الاكرام فعز مرسولها
.
ما راح تعرف خويك غير عقب السفر
وما كل يحتمل للصعبه ينولها
.
ان عانك الطيب ولا مالك الا الصبر
انصى وجيه الاحشام وجنب خبولها
.
حنا بشر بس دام الله خلقنا بشر
مافيه نفس ماهي تخطي ويبدولها
.
له الثنا والفضل والحمد له والشكر
بيبان رحمته مفتوحه على طولها
.
والي يخاف الهزيمه مايجيب النصر
غامر على الكايده حتى تجي حولها
.
معرفه الاجواد كنز وكنز طول الدهر
والناس صنفين كلن عارفن زولها
.
يا طيب طاب فعله لين قد له ذكر
ولا ردين مع الرديان وذيولها
.
والي يسمى صقر ماهو بلازم صقر
احيان الاسماء تاتي عكس مدلولها
.
اربح رفيع المعرفه وانتبه لا تخسر
من قال انا الي لها لا قيل منهو اليلها
.
وعشان تسلم من الزله وحكي البشر
ثمن حجم كل كلمه قبل لاتقولها
.
من جادل الجاهلين يضيع له في بحر
فلا تخاطب الناس الا بمستوى عقولها
.
‏ثنتين خذها معك يا من يهمك الامر
وصى عليها الحكيم لطيب مفعولها
.
لا تمدح العود لين يحط فوق الجمر
ولا تمدح الناس حتى تظهر فعولها


للشاعر حمد البريدي

ساعد في النشر والارتقاء بنا عبر مشاركة رأيك في الفيس بوك

المصدر: منتديات حبة البركة - من قسم: ثقاقة عامة وشعر