أجريت القسطرة [تجربتي بالتفصيل]

أجريت القسطرة [تجربتي بالتفصيل]

هذه نسخة مطابقة لموضوعي في منتدى التصلب وتم نسخه بطلب من بعض الاعضاء



السلام عليكم ورحمة الله وبركاته,,
حتى يستفيد الكل من تجربتي راح أقولكم عن عمليتي بالتفصيل الممل.,,,

سويت العمليه في الاردن عند الدكتور مأمون وفريقه في مستشفى ابن الهيثم قبل خمس أيام أي بتاريخ 21/7/2010 أنا كنت ثاني مريضه بهذا اليوم عملت القسطره.,,,

الاصابه بالمرض من قبل سنه ونصف تاريخ 11/ 2008 كان عمري18.,,,
انا الى الآن مستمره على ابر الافونيكس ما وقفتها خوفا من وقوع ضرر علي,,,

أعراضي اللي من بداية المرض الى ان قبل لا اسوي العمليه الصداع الطنين في الأذن عدم التوازن آلام واصوات في الرقبه شبيه بصوت جريان الماء في انبوب ضيق ضغط فضيع في اسفل الرأس اعلى الرقبه حتى اني كنت احس ان عيوني بتطلع من الضغط ثقل في الرأس.,,,

الأعراض اللي ظهرت واختفت قبل لا أسوي العمليه غشاوه في العين اليسار الدوخه الكهرباء .,,,

اعراض جتني قبل لا اسوي العمليه بأسبوع طبعا كانت اول هجمه لي من اصابتي قبل سنتين ضعف في عضلات الرجلين واليدين غشاوه في العين اليمين فقط توهج في الاضواء والألوان تنميل في الاطراف ضعف في التحكم بالتبول (ما أخذت كرتزون كملت ليما سويت العمليه).,,,

ملاحظه اغلب الاعراض خصوصا اللي جتني قبل اسبوعين ما أحس فيها الا لما اتعب نفسي جسديا ونفسيا ,انا هذي اعراضي كلها ذكرتها وغيرها لا يوجد.,,,

كان المفروض اسوي العمليه في الكويت وعملت كل المطلوب من الدوبلر وmrv‏ وغيره وعطوني رقم للعمليه وأخذوا رقم تلفوني عشان يدقون علي ويحددون لي موعد لكن انتظرت وانتظرت الى ان ما بقى شي و تخلص العمليات وصار ما يكفي الوقت عشان يعطوني موعد لمراجعات ثانيه وقلت اسويها في الاردن.

تركت بلدي الحبيب الكويت وسافرت للأردن بالتحديد عمان يوم الاحد تاريخ 18/7‎ ‎‏ يوم الاثنين راجعت الدكتور وعطيته كل المطلوب مني من تقارير وعمل لي تحليل cbc‏ ودوبلر مع اني كنت جايبتله تقاريرها ولكن للتأكيد كانت تقاريري من ضمنها الدوبلر كان مبين فيها ان عندي ضيق خفيف في وريد واحد في الرقبه من اليمين قاللي انشالله العمليه يوم الاربعاء تاريخ 21/7‎‏ ولازم تصومين قبل العمليه بأربع ساعات,,,

في يوم العمليه جيت الصبح الساعه ثمان للمستشفى طبعا صمت من الساعه وحده بالليل ليش انه حسبالي اصوم ست ساعات سويت كل الاوراق المطلوبه ابوي اللي سواها عني جزاه الله خير ويطولي بعمره آمين ودخلوني بغرفه عشان انام فيها بعد العمليه وعطتني السستر لبس العمليه مع الكبوس طبعا لازم يكون المكان اللي تحت البطن نظيف علشان اهو قريب من مكان العميله ,قعدت انطر وانطر وانطر تخيلوا جت الساعه وحده الظهر ليما الحين محد جاني وكنت ميته ميته جوع صارلي 12 ساعه ماكليت شي سألت السستر وين الدكتور قالت قاعد يسوي عمليه حق وحده جت معاي ,جان يجي دكتور اعصاب سألني عن كل الاعراض وبعدين فحصني ,وأخيرا بعد قلق وخوف و جوع وغرقه بالنوم جت السستر وقالت يلا العمليه وانا اهني شنو مت من الخوف وودتني غرفه القسطره اللي هي غرفة العمليات ونمت على السرير وغطوني بشرشف وفتحوا فيها فتحه دائريه لمكان العمليه وبعدين عقموا المكان وحطولي بإيدي درب دخلوا فيها الصبغه عشان تبين الاورده عدل راح تحسون بدوخه منها ولزقوا بظهري لزقتين عشان يشوفون نبض القلب ,وانا نايمه على السرير فوقي جهاز الاشعه دائري الشكل عشان يشوفون الاورده وعلى يساري في شاشتين وحده لنبضات قلبي ووحده للأورده تشوفونها مباشر يعني تشوفونها على الهواء مباشرة هههههه مو تصوير تشوفون الدم يتحرك فيها لون الشاشه ابيض واسود وبصراحه ما اتذكر الفريق اللي مع الدكتور خدروني والا لأ ,بعد خمس دقايق جا د.مأمون وبدأ بالقسطره فتح فتحه صغيره بأعلى الفخذ وطول قطرها تقريبا 1سم ,وتخيلوا كم لقا عندي وريد ضيق ,,,,,,,, 4 اورده لأن الصبغه تخليها تبين حيل اثنين بالرقبه واثنين بالصدر,استخدم البالونات بحجم 12ملم و‎ ‎16ملم, وبصراحه كانت العمليه بالنسبه لي مؤلمه جدا خاصه لما ينفخون الوريد ولما يدخلون السلك في الفخذ لي درجة اني قاعد ابجي بجي هستيري يالله سكت الله يجزاها خير وحده اسمها فاطمه مع الفريق كانت تهديني وسألني د.مأمون اشفيج ابتكلم ماني قادره فقاعد أأشر على مكان الوريد اللي حاطين فيه البالونه ليش انها قاعد تعورني, انا ما ابي اخوفكم بس علشان كان هذا الوريد فيه تضييق شديد جدا جدا فكان يعورني,أف وخلصت القسطره الحمدلله ,حطوللي رباط على مكان العمليه وودوني لغرفتي ونوموني وقالتلي السستر ما اتحرك ست ساعات وجتني وحده وعطتني 10 ابر سليكسان (مميع دم) وبيبي اسبرين مع بي كومبليكس لمدة سنة,,,,,

وهذا الوقت ست ساعات اللي ما اتحرك فيه كان اللي يعورني مكان العمليه واماكن نفخ الاورده ولكن نمت في سابع نومه خخخخ,,,,

لين خلصت الست ساعات واللي قومني تكرمون آلام المثانه وامتلائها ابقوم ماني قادره من عوارها واخيرا قمت بمساعدة اختي قطعت ايدها المسكينه ههههه,,,
طبعا ما طلعت من المستشفى ظليت نايمه فيه لأن العمليه تعورني وخذيت بندول وخف عني,,,,

طلعت من المستشفى الصبح الساعه 9 يوم الخميس تاريخ 22/7 السستر شالت الرباط وحطتلي بلاستر صغير وقالت تقدرين تتسبحين وتشيلينه وقالت لازم تريحين نفسج لمده شهر.,,,

لمدة اربع ايام بعد العمليه كان اللي يعورني مكان العمليه كنت عالخفيف امشي عشان ما تعورني وايضا مكان نفخ الاورده كنت ما اقدر اسجد او اعلي صوتي لأني احس فيها تنتفخ ويصير فيها نبض قوي والم,وراحت كل الآلام بالتدريج لمده اربع ايام.,,,,
ما ادري شمعنى انا احس بجذي بعد العمليه كلهم كانوا يقولون سهله وما تعور حتى البنت اللي سوتها قبلي كانت تضحك يوم طلعت من العمليه وتقول ماتعور,,,

الاعراض اللي راحت مباشره بعد العمليه الصداع التنميل ضعف العضلات اليدين والرجلين الام وصوت في الرقبه الضغط في الرأس التركيز والنسيان ,سبحان الله آخر عرضين كنت صج هم اللي حسيت فيهم تحسن اكثر شي كنت قبل العمليه مااقدر اركز على اي شي ونساايه,,

الاعراض اللي راحت بعد اربع ايام من العمليه ضعف التحكم بالتبول,
انا توني مسويه العمليه صارلي خمس ايام,,

الاعراض اللي ليما الحين باقيه الغشاوه في العين فقط توهج في الاضواء والألوان الطنين في الاذن عدم التوازن,
انا توني مو الحين احس بالتحسن اكيد من شهر الى ست اشهر بإذن الله تروح الاعراض الباقيه.

مو الدكتور نصحني بالراحه لمدة شهر انا كل ما اتعبت نفسي احس بدوخه ولازم ارتاح ,

ادري طولت بس حبيت اقولكم تجربتي بالتفصيل ليش أني قبل العمليه كنت ابي اي احد يقولي تجربته بالتفصيل حتى ارتاح واستفيد وقلت اكيد في ناس مثلي وحطيت هذي القصه الطويله العريضه,(فيلم هندي صح هههههه).

ساعد في النشر والارتقاء بنا عبر مشاركة رأيك في الفيس بوك

المصدر: منتديات حبة البركة - من قسم: فرضية الــ CCSVI

مشكوره عزيزتي على نشر تجربتك بالتفصيل الممل ... والحمد لله على السلامه
اخبريناااا ما وضعكي الان وما نسبة التحسن من قبل ؟؟؟؟
وارجوا من حضرتك متابعة الموضوع لافادة الجميع

حاااااضر,,,
بعد العمليه بالضبط قلت عنه بالموضوع كنت احس بنفسيه رائعه لا توصف تملأها السعاده والراحه كان شي لا ارادي هو جذي من الله ههههه الحمدلله لك يارب على هذي النعمه

هو من بعد اسبوعين من العمليه تلخبط علي كل شي كان في تذبذب [ظهور واختفاء بعض الاعراض] كان في تعب وارهاق ودوخه,,,,استمرت اسبوع,,,,,
وبعدها صارت حالتي مستقره,,,,

الاعراض الحاليه اللي اعاني منها>> غشاوه في عيني اليمين,,,طنين في الاذن,,,,,عدم التوازن,,,فقط,,الحمدلله الذي رزقنا هذا,,,,وانعمنا بنعمه التي لاتعد,,الحمدلله,,,

أشد على يديكِ بقوة عزيزتي أمل و أشكرك على إعادة طرح تجربتكِ هنا

عزيزتي أمل التحسن ما زال مستمرا و سترين ذلك إن شاء الله

المهم الصبر ثم الصبر ثم الصبر

و تيقني أنكِ قد قمتِ بالخطوة الصحيحة

الله يتمم عليكِ بالعافية و الشفاء التام يا رب

اللهم آمين