قصة عريس يوم عرسه

قصة عريس يوم عرسه

السلام عليكم ورحمة الله وبركاته

هذي قصه اعجبتني فحبيت انكم تقرونها
اليوم راح أحكي لكم اللي صار معي ليلة العرس وحسب شهود عيان
( لأن فية أشياء ما اتذكرها بسبب هبوط الضغط اللي صار لي يومها)
طبعاً الليلة اللي تسبقها ماقدرت أنام زين خصوصاً اني تزوجت بالحلم يمكن 4 مرات !!
أتزوج ثم اصحى ورجع أنام وأتزوج ثم اصحى ثم ارجع أنام واتزوج ..
المهم صحيت الظهر وقمت وصليت ورجعت للبيت أجهز أغراضي و أتروش
(تقول الوالدة من الربشه مفرش أسنانك بمعجون حلاقه)

لما صار العصر طلعت للحلاق وحلقت ورجعت قريب من المغرب ..
ثم رحت اتروش لكن هالمرة غير ..
تروشت بدورة مياه الضيوف من العجلة أكرمكم الله واللي تفتقد لأبسط الأشياء
وهو شامبو بيبي جوي "لادموع بعد اليوم"
وبمساعدة الوالده تم بحمد الله نقل أغراضي إلى دورة مياه الرجال ..
صلينا المغرب ورجعت البس طبعاً بعد العشاء أحنا عندنا عادة وهي
أنو بعض أهل وأقارب العريس يتجمعون في بيت العريس
عشان يطلعون معاه للقصر ..
وأنا جالس البس عشان انزل لهم واسلم عليهم أكتشفت أن المشلح اقصر مني بشبر
طبعا السبب عرفته بعد أسبوع
( وهو اني غسلته غسيل عادي موبخار عشان كذا كمش قماش المشلح )
طبعا صرت احوس بالغرفة وش اسوي وش اسوي
ورحت للوالده الله يحفظها وخبرتها .. هدتني وقالت بسيطه ..
حاول قد ماتقدر تكون جالس طول الوقت ولما تمشيء سو نفسك رافع المشلح شوي
ومدخله تحت يدك زي الناس الأكابر
المهم صلينا العشاء ثم نزلت وسلمت على الحظور
بعدين جلست واقاربي يناظروني ويتبسمون لين صار وجهي علبة الوان
بعدها جاء ابوي وقال يالله نطلع للقصر وركبنا السياره ..
أنا ورا.. وابوي قدام .. وعمي يسوق السيارة ورحنا للقصر والناس ورانا
لما قربنا من القصر عندنا عادة الناس تبداء تدق بواري ( طاط طيطييط طوووط طط طط )
من هنا أنا بدأت افقد السيطرة على نفسي
وصلنا القصر ونزلت ولما نزلت لقيت العالم متجمعين عند الباب عشان يسلمون علي ويباركون لي ..
طبعاً ابوي حاس بوضعي عشان كذا كان قد مايقدر يحاول يكون جنبي ..
وأول واحد سلم علي كان ابو البنت سلمت عليه وبوست راسه
وانا أنتفض ثم سلموا علي أعمامها ثم خوالها .. الخ لين دخت
وكان مره زحمة وخنقه وكان كل واحد يسحبني من جهه عشان يسلم علي
لين وصل دور عيال خالتي
طبعاً أول واحد منهم سلم علي وقال :
ماشاء الله الف مبروك وكل عام وأنت بخير
رديت عليه وقلت : الله يبارك فيك يارب
جاء الثاني وعرف اني مرتبك ومهبب لاني ما أستغربت من كلمة كل "عام وانت بخير"
فقام قالي : عيدك مبارك وكل عام وأنت بخير
انا رديت عليه وبكل براءة وقلت : تسلم .. من العايدين الفايزين يارب
جاء الثالث وخربها و قال : تقبل الله
رديت علية وقلت : من الجميع يارب .. جزاك الله خير
طبعاً العالم فطست من الضحك
لما شافني أبوي كذا قام سحبني ودخلني جوات القاعه
وجلست أكمل باقي السلام على الحظور
طبعاً كنت من الخبه اقوم وأقعد أقوم واقعد والسبب هو اني من الإرتباك
ماكنت أدري مين اللي سلمت عليه و مين الي ما سلمت عليه
فكان بمجرد مايمر من جنبي أحد أقوم أحسبه جاي يبغى يسلم علي
ثم أكتشف انه جاي يسلم على الشياب اللي جالسين جنبي
المهم فجأة وانا بمعمة أفكاري قام جميع الحظور مرة وحدة وأتجهو نحوي مباشره :
طبعاً أنا ما ادري وش السالفه
قمت واقف أحسبهم يبغون يودعوني دفعة وحده !!
طلع ابو البنت منادي عليهم للعشاء
ولسوء الحظ كان باب صالة الطعام خلفي ..
حسبي الله عليه اللي مصمم القاعة فجعني
المهم جلست شوي ثم قمت ورحت للقسم اللي مخصص للعرسان وطقيت الباب
أنا : طق طق
حارسة الباب : مين ؟
انا من الربكه اللي عايش فيها قلت : بيت الفلان (اللي هو اسم عائلة زوجتي)
الحارسه : لا عرس الفلان قصدك
أنا : ايوه نسيت .. أنا العريس
الحارسة وهي تضحك : ايوه مبين خلاص الحين بنادي لك امك
جت امي ودخلتني وعرفت أني مرتبك لدرجة الأرتجاج ..
قامت وسمت علي بالرحمن الرحيم وباركت لي ودعت لي
وقالت حبيبي ترا فيه خالاتك وبعض خالات البنت "متغطيات"
وعروستك وأمها بس وعطتني وردة عشان اعطيها العروسه
طبعاً أول مادخلت خالاتي صارو يزغردون واللي تصور وأعمتني بالفلاشات
مبروك مبروك ياعريس منك المال ومنها العيال وبرفاه والبنين ان شاء الله ..
ولما خلصت سلام على خالاتي رحت عشان اسلم على العروسه بالكوشه ..
طبعاً كنت مره مستحي ومرتبك وما اعرف كيف اسلم عليها
و كنت جالس أفكر كيف ؟؟
وخلال غمضة عين اكتشفت أني فوق الكوشه : ( شكلي كنت أركض )
ومن الربكه عطيت الورده ام العروسه وسلمت على العروسه سلام زملاء عمل
(يعني مصافحة باليد ثم حطيت خدي على خدها من الجهتين )
تقول العروسه أنك قلت لي وشلونكم عساكم طيبين وكيف الأهل والأولاد !!
طبعاً خلال ثواني حسيت إن السلام غلط فحاولت اتدارك الموقف وأصححه
فقمت وبست راسها (قلت يمكن كذا الصح )
قام شماغي ومسك في التاج اللي فوق راسها
وخذ تخبيص وكنت شوي وأطيح عليها .. وبطلعت الروح فكيته من راسها
المهم جلست جنبها عشان التصوير بعد ماخربت تسريحتها وبعد ماخصلوا تصوير
قمت وانا بقمة الربكه وحطيت يدي على جبينها عشان أقول الدعاء ..
طبعا الدعاء الصحيح هو :
((اللهم إني أسألك من خيرها وخير ما جبلتها عليه ,
وأعوذ بك من شرها وشر ما جبلتها عليه ))
أنا قلت (( اللهم أني أسئلك من خيرها في الدنيا والآخرة
واعوذبك من شرها في الدنيا والآخره ))
طبعا امي ماقدرت تمسك ضحكتها فسوت نفسها انها تبغى تروح تجيب سجادة الصلاة
وهي ميتة ضحك عشان أصلي .. بعدها جابت لي السجادة ..
اخذتها منها وفرشتها على الأرض ومن الإرتباك صليت ركعة وحده بس !!
طبعاً القبلة كانت لاشعورياً العروسه ..
حتى التسليم اللي في نهاية الصلاة وحدة كنت وأنا جالس والثانية وأنا واقف !
طبعا البنت كان وجهها محمر من الضحك !!
وصار عندها مغص حاد يومها بسبب كثرة الضحك !!
وهذي قصتي يوم عرسي بأول الصيفيه لاحد يرحمني


منقــــــــول
ساعد في النشر والارتقاء بنا عبر مشاركة رأيك في الفيس بوك

المصدر: منتديات حبة البركة - من قسم: ألعاب وترفيه