معلومات مهم جدا تعرفها عن مرض ال ms و المريض نفسه

معلومات مهم جدا تعرفها عن مرض ال ms و المريض نفسه

1 -المرض ده مش معدي
-يعني لا هو جرب ولا دور برد- ف مش لازم لما حد يقولك انه عنده المرض ده ترجع لورا خطوتين مش هتتعدي ما تخافش

2- المرض ده اصلا مرض مناعة ذاتية بيصيب الجهاز العصبي
و الجهاز العصبي حاجة و المشاكل النفسية حاجة تانية خالص يعني أنا مش مجنون الجهاز العصبي ده حضرتك مسؤول عن التركيز والذاكرة و الإحساس و الإدراك بالعوامل الخارجية و رد الفعل عليها
وده مش معنه انه مش متزن نفسيا

3-المريض الMS غير قابل للاشتعال او الانفجار او التحول مرة واحدة فبلاش البصة اللي انت عارفها و مش محتاج اوصفهالك ماشي

4-مريض ال MS ممكن يشتغل اي حاجة عادي جدا ويمارس حياته كشخص عادي هو بس محتاج انه ينظم مجهوده علشان يحافظ علي قدراته الإنتاجية ويبعد عن الاجهاد والارهاق والتوتر.

5-البنت او الراجل اللي عندهم MS
ممكن يتجوزوا عادي جدا و يخلفوا و يربوا عيالهم زي بقيت خلق الله عادي بردو ومش ضروري خالص ان اولادي يجوا MS برضو.

6-أعراض المرض حاجة من اتنين
يا اما حاجة مفاجاة و اسمها هجمة/انتكاسة او attack
يا اما أعراض عامة بيتعايش معاها نتيجة الاصابات الموجودة في الجهاز العصبي المركزي.... يعني مش حالة بتجيله ولا بتهيب مني و كلمة زي دي تاني و ممكن جدا يطلعلك الحالة اللي نفسك فيها و يديك بضهر أيده و يبقي مش عليه اي لوم ما هي دي الحالة اللي حضرتك نفسك تشوفها ما إحنا في نظرك مجانيين

7-الأكتئاب اللي بيصيب المريض ده مش علشان هو مش راضي علي حاله ولا علشان علاقته بربنا وحشه ولا ضعيفه لا قدر الله
لا خالص يا فندم ده احيانا كتير بيكون نتيجة طبيعية جدا من الأدوية اللي ماشي عليها
علشان كده وارد جدا ان دكتور المخ و الاعصاب بتاعه يكتبله علي مضاد الاكتئاب و لو الموضوع محتاج طبيب نفسي ف ده بردو مش عيب المشكلة عنده بتكون لخبطة في الكيمياء بتاعة المخ
مش هيقطع شراينه ما تخافش

8-،التداعيات الوارد انها تحصل مع المرض ده مش محتاجة اصلا مرض علشان تحصل
يعني هي ممكن تحصل لواحد معافا تمام -ربنا يعافي الجميع-
اقصد اقول لحضرتك انها تخضع فقط لقدر الله و مش محتاجة سبب يبررها و من ثَم هو كمان مش محتاج يبررها سواء حصلت او يطمن حضرتك انها مش لازم تحصل

9-،الأدوية بتاعته غالية لان معظمها مستورد وأدوية معدله جينين و لسه مش منتشرة زي أدوية الضغط و السكر
و عامتا التأمين الصحي ده ابسط حق من حقوق البني آدمين يا فندم

10،-من اكتر أعراض المرض انتشارا
سرعة الإرهاق علشان كده وارد جدا انه يبقي زي الفل بس كل مشكلته انه بيتعب بسرعة هو مش بيدلع لانه بعد ما بيريح شوية بيرجع تاني زي الحصان ربنا يحميه
ف هو مش بيدلع ولا بيتمارض هو بس طبيب نفسه
يعني هو اكتر واحد بيبقي عارف امتي هو تعبان و محتاج يفصل فعلا
و لانه إنسان مسؤول اول ما بيتحسن بيرجع يكمل اللي وراه عادي جدا

11- قصة المرض ده
اولا بس
المرض ده لسه مُكتشف بقاله فترة صغيرة واللي كان بيحصل ان الأطباء ابتدوا يلاحظوا ان في نمط متكرر من الأعراض
و مع متابعة المرضي عرفوا انه سببه خلل في جهاز المناعة
و بدل ما يكون جهاز المناعة بيهاجم بس الأجسام الغريبة عن الجسم و البكتريا او الفيروسات بس لا ده بقي بيهاجم الخلايا العصبية بتاعة الجسم نفسه
-ما اسمهاش مخه بياكل نفسه ياريت نبطل جهل شوية-

12 -لو اسم المرض غريب
فأحب اقول لحضرتك ان مرض السكر مثلا اسمه العلمي diabetes mellitus
فممكن جدا مع انتشار الوعي عن المرض ده
نغير اسمه لو تحب
بس الي الان هو معروف باسم MS

ساعد في النشر والارتقاء بنا عبر مشاركة رأيك في الفيس بوك

المصدر: منتديات حبة البركة - من قسم: استفسارات وتساؤلات عن التصلب وأعراضه