نصيحة لكل واحد من سن 50 فما فوق

نصيحة لكل واحد من سن 50 فما فوق

الفترة دي أكثر حاجة حضرتك محتاجها هي الصحة
سواء حضرتك بتاخد علاج لحاجة أو لأ !
وعلشان تحافظ عليها هقول لحضرتك على حاجات بسيطة
لكن فيها بإذن الله خير كتير جدا:
(اصرف فلوسك على 6 حاجات فقط وعود أهل بيتك عليهم)
.
1- الماء ... اشرب ماء باستمرار على طول اليوم حتى لو كميات بسيطة جدا كل شوية لكن اشرب ! وخلي الماء أسلوب حياة باستمرار
وبلاش تقول علشان هدخل الحمام كتير ! مش مشكلة لما تدخل كتير ! لأن ده أصلا بيحسن الكلى وبيقلل حدوث أي جفاف، لأن الجفاف وحبس البول هم أكثر شيء بيأثروا على الكلى مع الوقت !
وطالما حضرتك في البيت أو مكان متاح تدخل فيه الحمام، يبقى اشرب كتير على أد ما تقدر ! وباستمرار !
يعني الناس اللي بتشرب لتر ماء الصباح ولتر بالليل ! نظامهم غلط !
لكن الناس اللي بتشرب حتى لو ربع كوب كل شوية ده أفضل نظام تحافظ بها على الكلى طوال اليوم !
.
2- الخضروات: دي مفيدة جدا جدا للجسم بأي حال وبأي شكل من الأشكال (إلا إذا كنت حضرتك بتاخد علاج سيولة زي الماريفان -الوارفارين- هنا غالبا بتقلل وتراجع الطبيب المعالج وتاخد رأيه هنا لأنها بتعاكس مفعول العلاج-))
وسيبك بقى من هبد بتوع الفيس وإن الخضروات معمولة عند الكفار وملعوب فيها وكلام فارغ وربنا ياخدهم ويريحنا منهم علشان يبطلوا هبد ! لدرجة إنهم بيقولوا إن الخضروات والفاكهة والأكل عبارة عن نجس ورجس !!! حاجة قلة أدب يعني !!!!
المهم الخضروات مهمة جدا لنضارة الجلد زي الماء بالضبط وكويسة للضغط والسكر والشرايين والدهون غير الفيتامينات والمعادن اللي فيها !
.
3- الفواكه: نفس قصة الخضروات تكون دايما أسلوب حياة عند حضرتك ... والفاكهة الكاملة أفضل من العصاير حتى لمريض السكر ... وطبعا مفيدة جدا للضغط والقلب والدهون ..... !
.
4- السمك: لو تقدر تخلي السمك من 2-3 مرات أكل في الأسبوع يبقى كدة تمام جدا
وبالتالي تقلل أنواع اللحوم الثانية وخاصة اللحم الأحمر
وده مفيد جدا لأبعد حدا سواء ضغط أو سكر أو شرايين أو دهون أو وزن أو عظام علشان فيتامين د .... !
وبديل محترم جدا للحوم التانية وخاصة لمرضى النقرس (زيادة أملاح الدم)
.
5- الحركة: الحركة هي روح بعد الروح ... ودي لا مفر منها لأي إنسان مهما كان ... حتى لمريض شرايين القلب ... اتحرك على أد ما تقدر ... اتحرك اي حركة بس اتحرك !
وإوعى تقول بتعب من الحركة !!!
لما تتعب من الحركة هتروح تنام شوية وتصحى زي الفل !
لكن لما تقعد وتتركن الحركة، هتنام من المرض وتصحى مريض بردو !
الحركة بركة !
الحركة فيها كل خير بإذن الله !
طول ما بتتحرك، المرض مش هيعرف يلحقك !
لكن لما تقعد المرض هيقعد جنبك ويلازمك !
لو عندك ثوب في البيت وركنته شوية في الدولاب من غير ما تلبسه ! مع الوقت بيقدم ويتقطع ويدوب لوحده !
نفس القصة جسمنا ! لو ركنت عن الحركة هتلاقي العضلات بتقل وتضعف والعظام بتضعف ويحصل لها هشاشة ! وهتشتكي من إجهاد مستمر !
اتحرك أي حركة تقدر عليها ولما تتعب ريح شوية وارجع كمل تاني !
اتحرك طول اليوم !
وعلى الأقل يكون لك 30 دقيقة مشي سريعا يوميا أو جري 20 دقيقة
اعمل حاجات البيت بنفسك وبلاش حد يخدمك لكن ممكن يساعدك
اشتري طلباتك بنفسك واتحرك
اشتغل أي شغل لأن الشغل مش عيب مهما كان
اتحرك كتير هتفضل طول عمرك بصحتك بإذن الله
وارجع بالذاكرة لجدودنا هتلاقي صحتهم كانت حديد رغم إن مكنش فيه أكل عندهم أصلا !! لكن علشان بيتحركوا كتير جدا !
يبقى الحركة اجعلها أسلوب حياة لك ولأهل بيتك باستمرار
.
6- تقليل الوزن: دي أفضل حسنة ممكن حضرتك تقدمها لنفسك من ناحية صحتك
قلل وزن هتحس بحياة مختلفة عن قبل كدة
قلل وزنك هتشوف إنسان تاني غير قبل كدة
قلل وزن يقل ضغط وسكر وتتحسن الدهون والشرايين
قلل وزنك بالتدريج حتى لو تنزل نصف كيلو كل أسبوع ! بس انزل !
بلاش تكسل ! لأن الكسل هيكون قاتل لك !
قلل وزنك هتتحسن الخشونة ومشاكل الفقرات
قلل وزن هتتحسن مشاكل التنفس والرئة
.
7- المكسرات: لو متاح لك ماديا اشتريها باستمرار
ولو مش متاح لك يبقى عندك اللب والفول السوداني يكونوا متاحين للجميع بإذن الله
وخليها من وقت لوقت يعني مش لازم كل يوم حسب الإمكان
.
8- زيت الزيتون: لو متاح لك اعمل به أي حاجة في أكلك ... ولو مش متاح يبقى عندنا زيت الذرة والكتاب ودوار الشمس بديل معقول له .. وابعد عن زيت النخيل وجوز الهند وأي حاجة مهدرجة
.
ابدأ من النهاردة تغير حياتك
علشان تعيش طول عمرك بصحة كويسة وتخدم نفسك بنفسك وتستمتع بحياتك صح

ساعد في النشر والارتقاء بنا عبر مشاركة رأيك في الفيس بوك

المصدر: منتديات حبة البركة - من قسم: الصحة العامة