الإِشارة.. قصيدة أدهم الصغير فى ملتقى بيت الشعر العربى

الإِشارة.. قصيدة أدهم الصغير فى ملتقى بيت الشعر العربى

يستعد بيت الشعر العربي، بإدارة الشاعر سامح محجوب، لإطلاق الدورة الثانية من "ملتقى بيت الشعر العربى للنص الجديد"، وذلك خلال يومى 2 و3 مايو، فى إطار استكمال التجربة التى حققت حضورًا لافتًا فى المشهد الثقافى خلال دورتها الأولى.


الإشارة.. لـ أدهم الصغير

وقفتي مش لاجل حاجة
غير غريزة عيش مواطن
شخْللت فـ جيبوبه عملة الانتظار
عنده داء بالمسؤليّة يجيب خشونة فـ سِكّته
يسلِبه حق الفرار
النهار مبقاش فيه بركة
والليالي.. شاهدة عـ العمر اللي ضاع
والطابور من أجل حلمي
بيلازمني حتى أكتر مـ الصداع
باع ضماير ناس كتير قدام عنيّا
اجتمعنا واحتججنا
واتنبح صوت القضيّة
انت يبن المحسوبيّة
قولي مين بدّاك عليا؟
مش عاديّة أحلامنا لو نطلب حياة
جوّا الحياة
أوعدك اني ابقى راضي
حتى لو شقّوني راضي
بس لو زرعوا النواة
يا هناه اللي بيتاخد طريقه
بعد ما يخلّص سباق
الشباب.. والله معجونة اشتياق
الخناق الأصلي نَفسي
فـ العلاقة.. بين إيديا فـ الشمال
والفلوس من جوّا جيبي فـ اليِمين
ربي إني مسّني بينهم حنين
اليَمين لحمك ودمّك
والغلط لو كلت منه ملكش شبعة
خلي بالك..
المباديء في ليالي الفقر بدعة
هي وقعة جيل بحاله من فراغ؟
عيشة ايه اللي فـ أوروبا هتوهبك حرية يبني؟
لاجل إيه دول البعيد تديك فـ تبني؟
سيبني انا هفضل أعافر
سيبني انا فـ حضن الطابور
فـ المشاركة بالهموم
في الهزار علشان ندور
بس منمدش إيدينا
يبني حكم النفس لو عـ النفس كافر
هبقى حافر سكّتي يمكن أعيش
خدها لو ضاقت عليك
بس عهد عليك يصاحبي
سيب طريق


أدهم الصغير


• شاعر عامية مصرية من الإسكندرية
• خريج كلية الحاسبات والمعلومات
• عضو المكتب التنفيذي لرابطة شباب شعراء الإسكندرية والتي أقامت العديد من الأمسيات الشعرية بمراكز الشباب، أبرزها:
• مركز شباب الأنفوشي (البحري)
• له مشاركات شعرية في مؤسسات ثقافية مرموقة، منها:
• - مكتبة الإسكندرية ضمن "إبداعات شبابية"
• - مركز الحرية للإبداع ضمن "إبداعات شبابية"
• - عدد من قصور الثقافة في الإسكندرية
• مشاركات شعرية عبر القناة الأولى المصرية والقناة الخامسة (الإسكندرية) وإذاعة الإسكندرية
• حصل على:
المركز الأول على إقليم غرب ووسط الدلتا2025
المركز الثاني على مستوى الجمهورية في جائزة الشاعر الراحل أحمد شبانة (مؤسسة هيباتيا) 2023
المركز الأول بجامعة كفر الشيخ2023
التأهل لتصفيات مسابقة "إبداع 11 – الجامعات"
المركز الأول على المدن الجامعية (الدورة الرمضانية الشعرية) 2023
بالإضافة إلى تكريمات متعددة من مديرية الشباب والرياضة بالإسكندرية لمشاركاته ومجهوداته الثقافية
• صدر له "آخر تختة في الفصل" وفاز بمسابقة الراحل محمد بن صالح باشراحيل لعام 2025 عن دار منازل.

ساعد في النشر والارتقاء بنا عبر مشاركة رأيك في الفيس بوك

المصدر: منتديات حبة البركة - من قسم: ثقاقة عامة وشعر