الله .. لا .. غيّبك

الله .. لا .. غيّبك

الله لا غيِّبك .. يا لغايب الحاضر
***** خالي مكانك ولا غيرك يسدونه

ما يعوّض الشمس بدرٍ في السما ظاهر
***** والشمس ما عوّضت من فاقد عيونه

وانته مكانك محل الروح والناظر
***** ما يعوّضك حد .. ولا غيرك يحلونه

وحدك بكفه .. وكل العالم بآخر
***** وكلٍ بعينه يرى ميزان مضنونه

يتصوّره فوق ما يتصوّر الشاعر
***** واعذره لو قال .. مآ حد غيره بكونه

كلٍ يغني على ليلاه ويسامر
***** طيوف الاحباب والعشاق مجنونه

والليل موحش وبرده مثل ما خابر
***** يدفا على جمرة المشتاق وشجونه

كنّ الشتا من فصول العاشق مهاجر
***** والصيف خيّم على شطآن مكنونه

يتلاطم الشوق في قلبه بحر هادر
***** والصدر شاطي يظم الموج وطعونه

من تغرب الشمس لين شروقها باكر
***** والحال مسكين كان الله في عونه

والنفس من لهفها بحلامها تسافر
***** مع طيف مضنونها ما تقر من دونه

حتى ولوعندها ما تشتهي حاضر
***** ما تقنع إلاّ بمن هي فيه محنونه

ما يعوّض الطير جنّه في قفص فاخر
***** عن عشته بين شوك الطلح وغصونه

وانا حنيني حنين وخاطري خاطر
***** لو يشعر الليل .. فيني ضج بسكونه

أسمع لدمعي خرير الماي متحادر
***** شلال من عين وسط الروح مغبونه

وقول يا دمع تكفى بالعلن حاذر
***** ترا البكى عند بعض العالم مهونه

ويفول دمعي عليك الله لا تكابر
***** ما انته بآخر ولا أول من يلمونه

ما حل عاشق في الدنيا ولا غادر
***** الاّ وصابت سهام الغيبه حصونه

والحب .. هو الحياه ونبضها الطاهر
***** صعب اتصوّر حياة الناس من دونه

واللّي بليا حبيبه .. نصفه الآخر
***** ضايع .. ومن ضاع نصفه وين يلقونه ؟!!

عبدالله صالح العمري
ساعد في النشر والارتقاء بنا عبر مشاركة رأيك في الفيس بوك

المصدر: منتديات حبة البركة - من قسم: ثقاقة عامة وشعر

اللهجه تقيله بس المضمون حلو مليان احساس
شكراً

الشاعر إماراتي
و صراحة أحب الشعر الخليجي
كله ذوق وفن و إحساس

دمتي بود عزيزتي منى