الأمثال الشعبية: تأثيرها السلبى و الإيجابى على المجتمع

الأمثال الشعبية: تأثيرها السلبى و الإيجابى على المجتمع

· كنت أكتب مقالا , مستعملا فيه مثلا شعبيا, عندما طرأت لى فكرة تجميع أكبر عدد ممكن من هذه الأمثلة, و محاولة قراءة الرسالة التى تتضمنها كل منها, و التى يتم نقلها للعامة عن طريق الكلمة المسموعة بسهولة أكثر من نقل الكلمة المكتوبة.



· و نظرا لإرتفاع نسبة الأمية فى مصر, فإن تاثير الكلمة المسموعة يفوق كثيرا تأثير الكلمة المكتوبة, فى تكوين و تطوير المفاهيم الإجتماعية.



· و عند بداية إسترجاع هذه الأمثال فى ذاكرتى, تذكرت ما كانت المرحومة والدتى تقوله لى كلما ناقشنا أمرا من أمور الحياة, فقد إعتادت أن تقول: " على رأى المثل يابنى" ثم تسرد بعض الأمثال التى تعضد بها رأيها.



· و بدأت هذه المجموعة بعشرة أمثال, ثم تداعت بقيتها , و كلما تذكرت مثل, أطل آخر من ذاكرتى, الى أن قررت أن أنوقف عن التذكر لضيق المقام.



· و نظرة على هذه الأمثلة توضح أن بعضها يُجسد و يشرح وضعا معينا, و بعضها ينتقد بعض هذه الأوضاع , كما أن البعض الأخر يحبذ سلوك معين قد يكون له تاثير سلبى على المجتمع.



· و حيث أن لكل منا نظرة تختلف عن الآخر فى تقييم الأمور, فقد رأيت أن أسرد هذه الأمثال, و أترك للقراء مجال التعليق عليها, و تصنيفها من حيث آثارها السلبة أو الإيجابية على سلوك المواطن العادى:


· المية ما تجريش فى العالى.
· قليل البخت يلاقى العظم فى الكرشة
· الطبع يغلب التطبع
· أيش حشرك يا مملوك ........ بين الملوك
· الجعان يحلم بسوق العيش
· العين ما تعلاش على الحاجب
· درهم حظ, ....... ولا قنطار شطارة
· زى الأطرش فى الزفة
· يبوظ الطبخة...... علشان بنكلة ملح
· الباب اللى يجيلك منه الريح.... سده واستريح
· تعمل خير, يجيلك شر..... ما تعملش خير, يجيلك الشر منين؟
· يشتمنى فى زفة, .. و يصالحنى فى عطفة 0 (أو)
· يضربنى فى شارع, و يصالحنى فى زقاق
· من خاف سلم.........( أو)
· السلامة خير من الندامة
· إسعى يا عبد و أنا أسعى معاك
· سيبها على الله
· يا رايحيين, إتقوا شر الجايين
· كل فولة ولها كيال
· وشّها يقطع الخميرة من البيت
· يصوم يصوم .... و يفطر على بصلة
· إقلب القلة على فُمها.... تطلع البنت لأمها
· لقمة هنية...... تكفى مية
· إيش تعمل الماشطة فى الوش العكر
· الطمع يقل ما جمع
· أقرع و نزهى (أو)
· عريان (.......) و غاوى تقميز
· قبل الهنا.... بسنــــــــــــــا
· يا بخت من كان النقيب خاله
· اللى طلع البغل فوق المأذنة.... هوه اللى يقدر ينزله
· ضربوا بتاع الكزبرة..... خاف بتاع الكمون
· عريان سنة... إشتكى الخياط على يوم
· إدى العيش لخبازه.. و لو أكل نصفه
· جت الحزينة تفرح.... ما لاقيتلهاش مطرح
· ديل الكلب لا ينعدل, حتى ولو علقوا فيه قالب طوب
· فى الوش مراية, و فى القفا سلاية
· الإيد اللى ماتقدر تقطعها..... بُوسها
· لو كان لك عند الكلب حاجة....... قوله ... يا سيدى
· سكتناله... دخل بحماره
· قبل ما تتخطب, حضرت المأذون.... و قبل ما تحبل حضرت الكمون.... و قبل ما تولد.. سمته مأمون
· بعد ما أكل واتّكة.... قال لا ده ريحته مستكة
· اللى يتجوز أمنا, نقوله يا بابا
· يا داخل بين البصلة و قشرتها...... ما ينوبك إلا صنتها
· بعيد عن العين... بعيد عن القلب
· لو دامت لغيرك.... ما جاءت لك
· الحداية ما بتحدفش كتاكيت
· القط يحب خناقه
· حرص... حاسب.... قبل ما تناسب
· ربنا خلق ناس,...... يفلق بيها ناس
· من قدم السبت يلقى الحد قدامه
· إتلم المتعوس على خائب الرجا
· أصبر على جار السوء.... يا يرحل, يا تجيله مصيبة
· القرعة تتباهى بشعر بنت أختها
· مين شهد للعروسة؟ أمها و خالتها, و عشرة من ستات حارتها
· إمشى فى جنازة... و لا تمشى فى جوازة
· أنا و أخويا على إبن عمى,... و أنا و إبن عمى على الغريب
· لو كان فيها خير... ما كان رماها الطير
· أردب فى أردب. مادام كيله, لازم عليك شيله ( اللى يعمل جميل يكمله)
· خيبة بالويبة...... ( الأردب = 6 ويبة.... و الويبة = 2 كيلو جرام)
· اللى مالوش كبير, يشترى له كبير
· قصر ديل يا أزعر
· رضينا بالهم, و الهم مش راضى بينا
· السلف تلف, و الرد خسارة
· لسانك .. حصانك.... أن صنته, صانك, و إن خنته خانك
· ما أنيل من ستى إلا سيدى
· ياما فى الجراب يا حاوى
· علقة تفوت, و لا حد يموت
· عدو عاقل أحسن من صديق جاهل
· يا بخت من نام مظلوم و ليس ظالم
· الحلو ما يكملش
· أول القصيدة كفر
· خيبة الأمل ... راكبة جمل
· كنت فاكره عنتر... طلع عبلة
· جاى يكحلها... عماها
· الصيت و لا الغنى
· شرف البنت زى عود الكبريت, ما يولعش إلا مرة واحدة


منقول

ساعد في النشر والارتقاء بنا عبر مشاركة رأيك في الفيس بوك

المصدر: منتديات حبة البركة - من قسم: ثقاقة عامة وشعر