التصلب مش نهاية الحياة

التصلب مش نهاية الحياة

كل اللي حصل إني في يوم من الأيام وبين كل أصحابي حسيت إن الدنيا بتسود في عنيا ، حسيت إني مش حاسس بجسمي أو بالمعنى الأصح حسيت إني بدخل في عالم تاني أنا معرفوش
وفجأة!!! كأني دخلت في عالم تاني ، صحيت لقيت نفسي متوصل بأجهزة وفي الرعاية المركزة وكل التمريض والدكاترة حواليا
الدكتور قالي: حمدالله على سلامتك يا بطل كل ده علشان تبين غلاوتك عند أهلك وأصحابك ؟ هههههه
إيه اللي حصل يا دكتور ؟
الدكتور : مفيش حاجه شوية تشنجات بس شديدة شوية متفكرش في حاجة كلها يوم تحت الملاحظة وهتخرج بالسلامة
مر اليوم بين تشنجات وأدوية وجاء اليوم التاني المفروض إني هخرج فيه لقيت عنيا شايفة اللي قدامي اتنين
بلغت التمريض والدكتور حضر قالي : متخفش ممكن من شدة التشنجات والدورميكوم اللي اخدته ولو استمر معاك هنكشف رمد وممكن تلبس نظارة بعد كده
قولت مش مشكله أهم حاجة عنيا ترجع زي الأول
مرت ساعات وتنميل شديد في رجليا مع وخزات إبر شديدة وألم لا يعلمه إلا الله ، وبعدها عنيا نزل عليها ضباب
بدأت أصرخ أنا مش شايف والألم هيموتني
فحوصات طبية طويلة استمرت لأيام مع التشنجات
حسيت إن حلقي مسدود ومش قادر ابلع ولساني الكلام متلعثم وداخل في بعضه وبعدها ثقل في لساني مش قادر أتكلم ، ايديا وصلها التنميل 🥺
خلاص أنا كده بنتهي !!!!!
ركبولي رايل من أنفي علشان التغذية وفجأة جاءت دكتورة صغيرة في السن قالت أنا شاكه إنه يكون عنده ام اس ولازم يتنقل مستشفى تانيه فيها قسم متخصص
أهلي وأنا مش فاهمين يعني إيه ms
نقلوني مستشفى تانية وأنا شبه مشلول كلياً وفاقد النطق والبلع والتحكم في الإخراج
فحوصات طبية أخرى مكثفة وفي النهاية " عمر إنت عندك ms وده مرض مناعي بييجي للجهاز العصبي المركزي بالجسم بيسبب الأعراض دي ومتقلقش الأعراض بتروح مع الوقت والعلاج "
عاوز أرد واتكلم واحكي الألم اللي حاسس بيه مش قادر أتكلم بدأت دموعي تنزل لوحدها بانين من شدة الألم
أهلي بدأ القلق يتملكهم
أدوية وعلاج مستمر لحد ماتحسنت بعض الأعراض عندي زي النطق والازدواجية والبلع بس رجليا واقفة تماماً عن الحركة
جالي دكتور قالي : استاذ عمر حمدالله على سلامتك معلش تعبناك معانا والحمدلله إنك اتحسنت والتشنجات وقفت
أنا: بس يا دكتور رجليا مش قادر احركها نهائي هل هعيش على كرسي متحرك ومش هتحرك تاني
قالي: متقلقش ياما ناس على كرسي متحرك وناجحين ومؤثرين في مجتمعهم وانا واثق إنك هتنجح
كل كلام الدكتور إني خلاص هكمل حياتي على كرسي متحرك
حسيت الدنيا كلها بتبين الحقيقة المؤلمة دي
جالي والدي ووالدتي ووالدي قالي كلمة لا يمكن أنساها وليه الفضل بعد ربنا بسببها
قالي : مش عاوز ظهري يتكسر بسببك قوم وعافر مش متعود أشوفك كده قوم يابني
شوفت الدموع في عيونه هو وأمي
خرجت من المستشفى على كرسي متحرك وبدأت أعمل تمارين وعلاج طبيعي عن طريق دكتور صديق أخويا وعن طريق أخويا وأهلي في البيت
بدأت أحس برجليا بعد ما كانت شبه ميته ، شديت على نفسي في التمارين وفي أقل من 6 أشهر كنت سايب الكرسي المتحرك وبستخدم عكازين مع مساعدة أهلي في الحركة
استمريت في التمارين ومرت الايام لحد ماتركت عكاز وبقيت بسند على الحيطة
كنت بقوم واقع لحد ماقدرت اسند على الحيط لوحدي
وبعد أيام قليلة بقيت بمشي على عكاز بدون ما اسند على أي شيء
ولله الحمد قدرت ارجع وانجح في دراستي وشغلي ودلوقتي بحاول انقل تجربتي بطريقة علمية وتحت إشراف أطباء لباقي اخواتي الامساوية
في النهاية: التصلب المتعدد مش نهاية الحياة مهما وصلت شدة إصابتك واعراضك
أنت أقوى تقدر عليه 💪❤
أحبكم جميعاً في الله ❤
عمر مهران

ساعد في النشر والارتقاء بنا عبر مشاركة رأيك في الفيس بوك

المصدر: منتديات حبة البركة - من قسم: تجارب مع التصلب اللويحي