أفارق ...

أفارق ...

أفارق هالنجوم الطايحه
بين السما والقاع
وفي قلبي من الأوجاع..مايكفي
وفي قلبي أفارق
ورا هذي الجبال اسفوح
وعيونٍ مالها عيونك
ولا قلبك..
أسافر..كل قلبي جروح
وأنا أحبك..
أبي لاطبت..طفيتك حرايق
حزين اللي تركت البارحة وجهه
على كفوفك..
غسل بدموعه اطيوفك..
وغرستي قلبه احروفك بيارق
ولو بيديني غيرتك..
ولو مثلك في هذي الأرض ضيعتك
ودورتك..
ولكن انتي..غير انتي
وأنا مثل الخلايق..
أفارق..
ودايم قصة العاشق قديمه
مثل كل الفصول اللي
على مر الزمن تنعاد..
عزانا والدموع جداد
بإن الشمس وحده..وياكثر المشارق
في دروبي رمل..
لامن جيت ساري
ينبت الأشواك..
لامن رحت ساري
صاحبي..
ماجيتك إلا وفي طريقي
من ربيع العام..نوار وخباري
ولاتواعدنا وبه بالأرض زهره..
ولاتفارقنا وبه بالبرق طاري..
لاتأخر..دام لي في العمر ساعة
ولاتقدم..لين أشوفك في انتظاري
الزمن ورده..سهرت أحسب ورقها
وانقضى ماجيت في دموعي عواري
حبني كثر الذي نلقى بوعدنا..
من ظلال..وريح..ونجوم..
وغداري..
صاحبي..
مثل الخجل لوتكتسي بي
قبل أصير الشال يذهلني انحساري
ياقريب البعد..للشكوى أسامي
الجفا..والخوف..
وآخرها حذاري..
وانت لوخان الزمن باقول وافي
لاأنا تركي ولاأظنك مشاري..

للأمير الشاعر بدر بن عبد المحسن

ساعد في النشر والارتقاء بنا عبر مشاركة رأيك في الفيس بوك

المصدر: منتديات حبة البركة - من قسم: ثقاقة عامة وشعر