قصيده نصيحه

نصيحه , قصيده

قصيده نصيحه

يا بجاد أنا بوصيك في بعض الاحوال = وصيةٍ مني خفيفه ثقيله
وصيةٍ يطرب لها كل رجال = ألا صبيٍ ما يحوش الجميله
الأوله حافظ على خمس الاركان = سنة نبي حطه الله فضيله
دينك ترى دنياك تاتي وتنزال = وحلاوة الدنيا ليالي قليله
ترى ردي الدين يزداد بهبال = ونشفت هاذي حالته لا تسيله
يلقا نصيبه يوم تقسيم الاعمال = قدمه عميلٍ مايبور بعميله
أحدٍ يجيله مع هل الخير منزال = وحدٍ على شين المنازل نزيله
والثانيه بوصيك مالك والاهمال = ليا أهملت ماينفعك من تلتجيله
من ضاع ماله ضايعٍ فشهب اللال = سوات طرقيٍ يخلي صميله
ماله محب فالعرب دق وجلال = أن كان ماله مدةٍ من حصيله
مالك يحطك عن هل الشمس بظلال = يابجاد راع المال ما ينحكي له
لو هو قليل نفعته ماله أمثال = يغنيك عن غبر الوجيه البخيله
والثالثه حذرى معاشرة الانذال = من عاشر الرديان واعزتي له
ترى الردي دايم بخيلٍ ومحتال = ومعاشره يكسب عليك الفشيله
عاشر عريب الجد والابو والخال = اللي يصدر بالحمول الثقيله
اللي يسد الباب نقاض فتال = يشفيك لون المواني قليله
وخلك لهتاش الخلاء واديٍ سال = وفي حق ضيفك لاتشير الحليله
شور المره حذرا تحطه على البال = ترى النساء فيهن بخيله رزيله
وفيهن من تمشي على كل مجدال = وفيهن من تشدي المهار الأصيله
وخلك لزلات الموالين حمال = أنقل عياهم زال تقدر تشيله
ألا ليا حدوك ربعك على الجال = بع دارهم والدار تلقا بديله
وحذر تعيل ولاتراخى لمن عال = ولا خير في رجلٍ تسمى بعيله
ولاتستشير ألا بعارف وعقال = والزم طريق الحق وعرف دليله
وعط الرجال حقوقها مثل ما قال = كلً عطه مردود عبره وكيله
وخلك لراع الطيبه فال وعقال = وراع الردى يشتالها في شليله
والرابعه جارك ترى الجار ينشال = خله حشيمٍ لاتظعن رحيله
لو كون رجل ضيق الصدر زعال = خلك تراعي خاطره كل ليله
وحشم خويك لاتجي عنه ملّال = حق الخوي وصبي عينك مزيله
ترى الخوي عند الاجاويد له حال = ولابد كلً ناحرٍ له قبيله
وفك الخوي ولا تجي عنه ذلّال = وعيبٍ لمن طاع العرب في دخيله
ليا دخل فالوجه ما عنه محوال = لو يطلبونك حق لاتنثني له
والخامسه وردك على العد بحبال = يسقي المعادن شربةٍ حنظليله
وربعٍ بالا عيه وعارف وجهال = يجي عليهم من هذولاك ميله
والناس كلٍ دون عانيه مازال = قد صار من كل القبايل فعيله
وربعك هل الناموس ذرفين الافعال = مطير مروين السيوف الصقيله
فالضيق يشكي ضيمهم كل خيال = ليا طار ستر منسعات الجديله
وبينتلك فالمرجله هاذ الاشكال = وباقي المراجل خلها للي لهيله
ونا تراني مخيلٍ فيك بخيال = جعلك ورى خرص العرب فالمخيله
حطيتلك بيتٍ على جال مدهال = خله قبل مفتوح للي يجيله
يجيلها من والي العرش حلّال = والعمر يفنى والليالي طويله
وصلاة ربي عد ما قايلٍ قال = على نبيٍ لاش غيره عديله

للشاعر عبدالكريم بن سليّم العقيلي المطيري

ساعد في النشر والارتقاء بنا عبر مشاركة رأيك في الفيس بوك

المصدر: منتديات حبة البركة - من قسم: ثقاقة عامة وشعر