مبسوط ولا مرتاح؟

مبسوط ولا مرتاح؟

أهم سؤال تسأله لنفسك وإنت بتاخد قرار:
هتبقى مبسوط ولا مرتاح؟

فالقرارات المصيرية والاختيارات المهمة الانبساط مش أهم حاجة لإنه وقتي وبيخلص بسرعة ومصادره مختلفة ومتغيرة. ممكن تتبسط بفيلم أو خروجة أو أغنية أو أكلة أو خبر نجاح أو حتى مكالمة تليفون من صديق قديم أما الراحة فدي حاجة تانية خالص وهي العنصر الأهم. الراحة بتتبني، بتتكون، بيتخططلها. الراحة مع غيابها مافيش أمان ولاتركيز ولا إنبساط. الراحة بتحتاج ثقة وليها تفاصيل منك وحواليك. بتحتاج مجهود وتركيز عشان تحافظ عليها وتحققها لحد بتحبه أو بتهتم بيه وطبعًا عشانك إنت. بس كمان الراحة أسهل وأسرع حاجة تحس بيها أو ماتحسهاش وأهم إحساس لازم تعيشة وماتتجاهلوش وتنتبه لوجودها من عدمه. الإنبساط إحساس والراحة أسلوب حياه. لما بنكبر بنشتري الجذمة إللي مريحانا مش دايماً إللي عجبانا. أختار ناس تفهم سكاتك مس ناس بتضحكك. أختار أماكن فيها براح مش بس عالمفتاح. خليك فالمكان إللي يقدرك وتحس فيه بانسانيتك مش بس إللي فيه جاه وفلوس. الراحة بتوصل للإنبساط أما الإنبساط فصعب قوي يوصل للراحة. الإنبساط وقتي أما الراحة بتكبر معاك لإنها مرتبطة بتفاصيلك مش بالمواقف. لما تتعود تدور على راحتك مع الوقت مش هيعجبك ولا يلفت نظرك غير إللي بيريحك.
ولو فحياتك إنسان بيسعى لراحتك ويدعم إختياراتك إللي بتريحك أو تتأخر ولا تبخل عيله فراحته.

ولو عايز تعرف حد بجد وتكتشف هو صريح مع نفسه وفاهم مشاعره قد أيه إسأله:
هو إنت مبسوط ولا مرتاح؟

ساعد في النشر والارتقاء بنا عبر مشاركة رأيك في الفيس بوك

المصدر: منتديات حبة البركة - من قسم: البرمجة اللغوية العصبية