سنة أولى جواز

اولى , زواج , سنه

سنة أولى جواز

" أموت وأعرف مين زقنى ياحنفي ؟؟ " .. أكترجملة بتدور في بالك فى أول سنة بيوعدوك فيها بالجنة وإنك هتتبسط ولاد المبسوطة المتجوزين وحياتك هتختلف تماما ..هى بتختلف فعلا مفيش كلام !أول طشة جواز بتتصدم فين الحب والوعد بالسعادة، ليه الخناق وكمية المشاكل اللى بنغرق فيها؟!






وإليكم بث مباشر من مسرح الأحداث:



- زوجة لشهوربتتخانق علشان جوزها بينسى يغطى التواليت وهي مؤمنة أن طاقة سلبية فى الحمام بتتنقل للشقة



- حد بيقص ضوافره وبعدين يلمها والتاني مصمم يجبره يقصها فى منديل



- رجل شايف إن ملوخية أمه هي الملوخية الصح وأى ملوخية تانية تبقى "لينا" فشلت ولازم ياخدها "وشين" تريقة!



- رجل قبيلة ستات كانت بتخدمه: الشغالة، إخواته البنات، الحاجة والدته.. دون شكوى زي المدام!



- ست شايفة أبوها كان بيديها فلوس أضعاف وعمره ما حاسبها صرفتها فى إيه..



- رجل شايف الست بتلبس فى سبع ساعات وبتسافر بعشرين شنطة وبتشترى ست آلاف شنطة إيد بنفس اللون مختلفين في الحجم.. أشياء محتاجة علاج نفسى عميق!



- رجل بيخرج كل يوم زي ما هو متعود ومحدش يحاسبه وست عايزة شوية إهتمام أكتر من خروجة يدلقها بعدها ويجري على أصحابه!



- ست بتلبس شبشب الرجل فيعترض بشدة، وهو يسرح بفرشة شعرها فيدبوا عركة تسمعها الجيران.



- رجل أحيانا مستعجل وغير متفهم إن الست من أيام ما كان عندها سنتين بعد ما قلعت البامبز لبست كلون طويل فوقه شورت وسمعت كلمة لمي رجلك البنات مبيقعدوش كدة مليون مرة لحد ليلة الدخلة!







- رجل بيشتري عشر أنواع جبنة لكن بينسى النوع المعين اللى الست قالت عليه، من وجهة نظره هو كريم ومن وجهة نظرها مهمل..



- مبيردش على تليفونه، مورهاش غير القعدة على الفيسبوك، مبيتفرجش غير على الكورة والسياسة، يقطع كل مسلسلاتها التركي وشحتفتها من العياط فى كل حلقة، هو عايز يخلف ولد، هي عايزة تخلف بنت، هو مبيحبش زيارة أهلها، هي مبتحبش مرات صاحبه الغلسة، هي نضفت السجاد وهو دخل بالجزمة، هي عايزة تخرج وهوعنده صداع، مين خلص ازايز الشامبو، مين شرب كل اللبن ونسي يشترى غيره، ويستمر صراع هو وهي طول اليوم على أدق التفاصيل !!







حياة الاتنين بتتنسف بعد الجواز، أصعب حاجة التعود على تقبل عادات الآخر اللي هو مقتنع إنها الصح المطلق بحكم سنين التربية وأي محاولة للسيطرة بالمنطق أو بالصوت العالي بتخلق مشاكل، الحل فى ذكاء أنك تلاحظ بيحب إيه ويكره إيه وتبذل مجهود إنك تريحه.. اللي بيريح التانى بيريح دماغه واللي بيسعد الآخر بتلف السعادة وتتصب فوق قلبه.. العند بيولد العند والصوت العالي بيولد الجفاء. الأيام هتعودك على أول طشة ساقعة في بحر التجربة وتتحول العادات السخيفة لذكريات مضحكة. خلطة النجاح فى أول سنة شوية صبرعلى حب على تنازل من الطرفين على شوية تقبل للآخر بعبله دون محاولة تغييره لإن محدش بيتغير! ومحدش بيسيطر! احنا " شركاء حياة " بنفرح سوا وننجح سوا وبنحزن سوا ولوفشلنا هنفشل سوا !!


حياة متزوجة جديد

ساعد في النشر والارتقاء بنا عبر مشاركة رأيك في الفيس بوك

المصدر: منتديات حبة البركة - من قسم: ثقاقة عامة وشعر