ويقول المصري.. قصيدة جديدة لـ ماهر مهران

ويقول المصري.. قصيدة جديدة لـ ماهر مهران

ويقول المصري:

أهلًا بيكم في الأراضي المصرية
اللي تشبه وردة ف الصبحية..
وف الضحى مراية وسع البحر..
وف الضُّهر سيف دهب ضد الكسر..
هيّ نص الليل زي العصر..
أمّا المغرب عندنا مش موت
لكن بداية لنهار تاني
ولمَّة أخوية..
ويقول المصري:
أهلًا بيكم ف الأراضي المصرية

حيث العنزة بترعى جنب الديب
حيث المولد والمجاذيب
حيث الإنسان الطيب جدًا
والناشف جدًا
واللي رغم بساطته بيعمل أعاجيب
حيث الجامع حاضن دير وحاضن معبد
حيث الفلاح اللي بيرفع نخلة بأيده
وبيصنع م اللضا فرحه وعيده
حيث الفنان اللي بيعمل موناليزا
من حبّة كراكيب
حيث الكبير اللي بكلمة يهد جبل
حيث الستات اللي يخلّوك تاكل صوابعك لو دقت التقلية..
ويقول المصري:
أهلًا بيكم ف الأراضي المصرية

اللي فيها الجمّيزة أقدم من أمريكا..
واللي لغات الأعداء أقل من أسامي الويكة
واللي ألوان معابدها
رغم زوال أمم لسه قاعدة فابريكا
واللي البصة ف نيلها هاتغسل همّك
واللي شفطة من مُيتها هاترجّع الحيوية لأمّك
واللي كبّاية شاي على قهوة من قهاويها هاتروّق دمّك
واللي حجارتها فولاذ
ولغتها عتيقة
وشفرتها ع الفك عصيّة..
ويقول المصري:
أهلًا بيكم في الأراضي المصرية

ضيوفنا منّنا وعلينا
وعلي بيربّي اللي يضايق مينا
وبطرس عمّال يداوينا
والستر ربنا سبله علينا
عشان كده طول عمرنا بنكسّر أنوف أعادينا
أنا باخدم ضيوف مولد هرمينا
وريمون بيوزع لحمة ف مولد الشيخ سلمان
واحد ف الفرح وف الأحزان
كأننا لبشة قصب
حلوة بس ع الكسر عصيّة..
ويقول المصري:
أهلًا بيكم في الأراضي المصرية

حيث العصافير بتنام على ورك الضُّلة..
حيث الناس بتبعتر للقمري الغلة..
حيث القيدة واللمة والشلة..
حيث الوطن ملة..
حيث الأمّي موسوعة
والراس مرفوعة
والكلمة مسموعة
والأيد التقيلة
اللي بتندّم الهمج والعدا والنطوعة
وتخلّي الباغي ولية..
ويقول المصري:
أهلًا بيكم في الأراضي المصرية

حيث اللي بيشيل فجر
واللي بيدهن الهوا دوكو
واللي بيثبّت ف المافيا
واللي صوابعه تتلف ف حرير
واللي لمّا يتكلّم تسمع رنّة الإبرة
كأنها خرير
واللي بيعمل من الفسيخ شربات..
حيث البيوت آثارات..
والنسر في المغارات
والجبال أسرار
وف كل شبر هاتلاقي لقيّة..
ويقول المصري:
أهلًا بيكم في الأراضي المصرية..

ساعد في النشر والارتقاء بنا عبر مشاركة رأيك في الفيس بوك

المصدر: منتديات حبة البركة - من قسم: ثقاقة عامة وشعر