منتديات حبة البركة - طريقة عمل بلح الشام في البيت ببيضة واحدة بطريقة سهلة وبسيطة

المقادير :

٢ كوب دقيق
٢ كوب ماء
بيضة
ربع كوب زيت وممكن زبدة
رشة سكر + رشة ملح
معلقتين كبار نشا + معلقتين كبار سميد بسبوسة

تعالوا نحضر الشربات الاول 👌
٢ كوب سكر عليهم كوب ونص مية حطيهم في حلة علي نار متوسطة واعصري عليهم نص ليمونه وسيبي الشربات يغلي حوالي ٥ دقائق او ٧ دقائق وقبل ماتطفي عليه حطي كيسين فانيليا بعد كدا أطفئ عالشربات وسيبه يبرد خالص

طريقة بلح الشام 👇

هاتي حله وحطي فيها المية ورشة الملح والسكر والزيت
وحطيها عالنار واول ماتبدأ بالغليان أطفئ النار وحطي الدقيق وقلبي بالمعلقة في الدقيق لحد مالعجينة تبرد خالص حطي البيض عالعجينة وكمان رشة فانيليا واعجني كويس باايديكي وفي الاخر حطي النشا والسميد واعجني بردو كويس جدا لحد ماتكون معاكي عجينة طرية وليمة

هاتي كيس الحلواني وقمع بلح الشام قبل ما تحطي العجينة في الكيس الحلواني إدهني الكيس مسحة بسيطة من الزيت عشان العجينة تنزل معاكي بكل سهوله

في طاسة حطي فيها زيت غزير وشكلي فيها بلح الشام والزيت يكون بارد بعد كدا ولعي النار عليه يستوي والنار تكون هادية عشان يستوي كويس جدا اول ماياخد لون احمر اقلبية الناحية التانية يحمر طلعيه من الزيت عالشربات علطول والشربات طبعا يكون بارد وبلح الشام سخن
طلعي بلح الشام من الشربات علي مصفي عشان يصفي اى شربات زيادة كل مرة تسوي بلح الشام عالنار لازم تبردي الاول الزيت عشان بلح الشام ميتحرقش منك ويستوي كويس

بلح الشام ماشاء الله جميل ومقرمش 👌
صلوا على الحبيب المصطفى