منتديات حبة البركة - يالعبد لاتشكي

يالعبد لاتشكي من اللي جرالك=خل التشكي للنفوس الضعيفات

إصبر لو إن إتصير سودن ليالك=وإطلب وليّك بالامور الصعيبات

غير الولي محدن درى عن حوالك=هو الذي يكفيك شر المتاهات

صل الفروض الخمس وإكسب ريالك=على الدروب الطيبات النظيفات

اوصيك من قلبن نظيفن بغي لك=الخير يامال السنع والسلامات

لاتقول وقتك شاينن ماصفالك=كم واحدن غيرك جروحه عطيبات

خل الحسايف وإترك اللي مضالك=ترى الحسايف ماترد الذي فات

لاتصير دايم سابحن فى خيالك=تهدم وتبنى لك بيوت وعمارات

دنياك هذي ليلها ليل حالك=لاجات لك يومين راحت ولاجات

إصحى قبل تصفق يمينك شمالك=ثم مد للموظوع يالقرم نظرات

إليا ظهر سدك ترى من خبالك=إحرص ولاتبيح العلوم الخفيات

وإن مال وقتك كب عمك وخالك=وإنخى الذي خالق جميع البريات

بعض القرايب تنحرف عن حبالك=فيهم ترى نذلن وحاسد وشمات

لو مت ماضني تعيشّ عيالك=إتكبهم للفقر وأيظا العصابات

والبعض منهم لو من الفقر هالك=تلقاه دايم لك عزومه قويات

فيهم رجالن تظهرك من مهالك=شجعان ويديهم لخصمك طويلات

إحفظ لهم مايقدمونه وبالك=تنسى وتجحد فعلهم بالملمات

لاجوك محتاجين سق من حلالك=للطيبين اللي عطوك الجزيلات

إليا نخيت القرم منهم عنالك=تلقاه حاظر لك على كل الاوقات

بالهوش وإلا لو يفارقك مالك=تلقى يمينه تجزل إلك العطيات

حرن لاشاف الوقت بالشر طالك=ماقال مالي معك بالظيق وقفات

إليا بكيت إمن المصايب بكالك=وإليا ضحكت اتبادلك منه ضحكات

قرمن شريفن مايمد الدهالك=بالطيب عدا بالجبال المنيفات

كل ماتطيح بدرب عنزّ وشالك=وأيظا عشانك يسهر الليل مايبات

هذا مثل ماهو بخيرن سعالك=جازه بحسنه واحده عشر حسنات

خلك معه بالطيب ويطيب فالك=لاتفارق الممدوح راع البطولات

لاقل ماله يالسنافي وجالك=إغنه لوإن إتصير راعي قضيات

وإمن العدا لاتقول مالي ومالك=إحمه وعزه بالسيوف الشطيرات

وابعد عن الرادي ردي المسالك=اللي عليه اتفوز كل العفيفات

إليا خسرته ماش شي ن غدالك=وإلياكسبته مالك إلا الملامات

هذا ترى غير الردى مانوالك=يبغاك مثله بالعلوم الرديات

إلياتبعته يالسنافي فضالك=ثم قام يبني لك نوايا وحيلات

كب الخسيس النذل جعله فدالك=وإتبع رجال إلهم سلومن وعادات

ربعن ليامنه نصاهم مجالك=قالو ونعم الرجل راع المروات

لاحسو إبحاجتكّ منهم غزالك=خيرن يخلصها بلا إسمن ولاإثبات

مايحرجونك لجزلو بالصخى لك=ولايهينونك بذكر الجمالات

كل ماتقابلهم ماينحاس بالك=منهم تونسك العلوم الطريفات

وإن غبت مابه يوم طقو ظلالك=مال النميمه عندهم شرب وفتات

هذي نصيحه من خفوقن بنالك=قصيدتن يالعبد ياطيب الذات

فيها عبر منها تحوش الممالك=وتقربّك للحي عن ميتن مات.