منتديات حبة البركة - ضرورة التوعية للتصلب المتعدد

ركبت من أسبوعين مع سواق تابع لشركة من الشركات الخاصة بتوصيل الركاب وأنا معاه في العربية جالي إتصال من حد من اخواتنا الامساوية بيسالني " أنا أخدت خمس جرعات سوليميدرول علشان عندي هجمة على عنيا ولسه مفيش تحسن لدلوقتي هل ده طبيعي ؟
فحكيت معاه شوية بخصوص بعض الأعراض اللي أوقات بتطول مع المريض
فالسواق سألني حضرتك دكتور؟
قولتلوا لا أنا مريض بالتصلب المتعدد وده مرض مناعي بييجي للأشخاص وبيسببلهم بعض الأعراض واللي كان بيكلمني مريض وعنده عرض من الأعراض دي وبيسال هل هيطول بعد جرعات الكورتيزون ولا لأ
قالي أصل حضرتك زوجتي عندها معظم الأعراض اللي حضرتك حكيتها دي بالظبط وللأسف بتتعالج مع دكتور وقالها إنها بسبب التشنجات بسبب كهرباء في المخ عندها
المهم وجهت الشخص ده إنه لازم يروح يكشفلها عند دكتور كبير ولازم هيطلب منها بعض الفحوصات الطبية علشان من المحتمل يكون حاجة غير الكهرباء في المخ
قالي هاخد رقم حضرتك وهتابع مع حضرتك لو مفيش أي إزعاج
قولتلوا اتفضل وشرف ليا أكيد
المهم السواق النهارده كلمني وقالي إن زوجته الدكتور قالها إن عندها تصلب متعدد وإنها كانت المفروض تتشخص من فترة لكن للأسف الشديد أتأخر تشخيصها واتشخصت غلط وده اللي زود أعراضها وان الدكتور قاله إنه كويس جداً جداً جداً أنه لحقها قبل تفاقم الأعراض عندها
اقسم بالله العظيم كمية دعوات غير طبيعية وفرحة لا توصف
رسالتي لكل أخ وأخت لو قعدتوا مع أي شخص عرفوه إيه أعراض التصلب المتعدد
بمعلومة بسيطة تنقذ حياة إنسان

أخوكم عمر مهران