منتديات حبة البركة - سراب الأماني

سراب الاماني

ما بقى شي عندي .. في الحياه اخسره
***** بعد ما نا خسرتك .. وش بقى ما يهون

كل غالي أحبّه .. كنت فيك انظره
***** من محياك يشرق .. فرحه بكل لون

واصبح الكون بعدك .. ليل وآنا اسهره
***** موحشه في ظلوعي .. ضجّته والسكون

ألتحف شال برده .. وافترش مجمره
***** وارتوي من سرابه .. يابسات الطعون

ان عليِّ ناض طيفك احتضن منظره
***** واتعطّر بشمّه .. دهن عود ودخون

وبشغف أتقوّى .. عنّك اتخبّره
***** كنّه احيا بقلبي .. ذابلات الغصون

قلبي اللّي تركته .. مثل جذع شجره
***** مات .. لكن على الله .. لو تجيه المزون

عادة المزن يحيي .. موت ارض اقفره
***** وعادة الوصل يحي .. ميتين الضعون

وعادتك من عرفتك .. للعفو مقدره
***** ماعرفتك اناني .. ولا عرفتك .. منون

حتى هرج العواذل .. فيك مدح اكثره
***** من عذوبة وصوفك .. والحلا ينهلون

كنّ شهد المناحل .. بك سكب سكّره
***** كل ما زاد ذكرك .. فيه يتلذذون

كيف انا .. وانت عشقي .. أوله وآخره
***** واجمل احساس عشته .. والحكي ذو شجون

ما قصدت اني اجرح .. خاطرك واكسره
***** لكن الغيره العميا .. غضبها جنون

واصبح الدم .. دمعي .. للقلم .. محبره
***** يكتب اسمك .. وعذري .. بين رمش وجفون

ليت عندك .. لذنبي .. والخطا مغفره
***** وليت يرجع .. بقلبك .. منزلي يا حنون

بس قلبٍ تكسّر .. صعب أحد يجبره
***** ما تجبّر قلوبٍ .. كسّرتها الظنون

عاذرنك .. وشايف .. غيمك الممطره
***** ما بقي من أثرها .. غير نزف العيون

لكن اللّي مفارق .. تحت ظرف اجبره
***** من سراب الاماني .. يستخيل الهتون

وانت مهما افترقنا .. حلم .. يا مكبره
***** دامني حي .. ما يئس .. لين ياتي المنون

وكل انسان .. موته .. لين ما يحضره
***** في مراده معلق .. والمقدر يكون

عبدالله صالح العمري